ვსაუბრობთ ილიაზე

     გადავწყვიტეთ კიდევ ერთი კვირეულის ჩატარება და ეს კვირეული მივუძღვენით ილია ჭავჭავაძეს. გავეცანით ილიას ბიოგრაფიას, საპროგრამო მასალის გარდა წავიკითხეთ მოგონებები დიდ მწერალზე, მისი ლექსები და ბრძნული გამონათქვამები. ვნახეთ მხატვრული ფილმი ,,კაცია-ადამიანი?!" ვიყავით თბილისში ილია ჭავჭავაძის სახლ-მუზეუმში. 26 ნოემბერს კი ჩავატარეთ შემაჯამებელი გაკვეთილი - ,,ვსაუბრობთ ილიაზე", სადაც მოსწავლეებმა ისაუბრეს ილიას ღვაწლზე და თავიანთ შთაბეჭდილებებზე. გაკვეთილს ესწრებოდნენ მოსწავლეთა მშობლებიც. დაგეგმილი გვაქვს საგურამოში ილიას სახლ-მუზეუმის მონახულება.

მოგზაურობა კოსმოსში

     22 ოქტომბერს ჩავატარეთ კიდევ ერთი ინტეგრირებული გაკვეთილი (ინტერაქტიული თამაშებით)  ,,ვირტუალური მოგზაურობა კოსმოსში''. ამ მოგზაურობის დროს მოსწავლეებს ბევრი სხვადასხვა დავალების შესრულება მოუწიათ, რაშიც ბუნებისმცოდნეობისა და ქართულის გაკვეთილებზე შესწავლილი მასალები დაეხმარათ. კოსმოსში მოგზაურობისას გაიცნეს უცხოპლანეტელი. ზემოდან გადმოხედეს დედამიწას, მიუახლოვდნენ მზეს, ხომალდი დასვეს მთვარეზე და დაათვალიერეს მთვარის ზედაპირი, ბოლოს მშვიდობიანად დაბრუნდნენ დედამიწაზე. გაკვეთილზე გვესწრებოდნენ სკოლის დირექტორი ბატონი შოთა მალაზონია, პედაგოგები: თამარ ყაჭეიშვილი, მაია თორდინავა, ნელი ნადირაშვილი, ნუნუ კარიაული, მაია მჭედლიშვილი, ნინო ფირცხალაიშვილი, ლია ბახუტაშვილი, ირმა ყიფიანი, მაია ბაღაშვილი, ქეთევან ასანიძე, იზო გურგენიძე...
     23 ოქტომბერს მშობლებთან ერთად გავაგრძელეთ კოსმოსში მოგზაურობა, ჩვენთან ერთად იყო ჩვენი ინგლისურის პედაგოგი დიანა მათიაშვილი. მოსწავლეებთან ერთად სხვადასხვა დავალებებს მათი მშობლებიც ასრულებდნენ. გაკვთილის ბოლოს მოსწავლეები დაჯილდოვდნენ სიგელებით და მიენიჭათ ,,ნორჩი კოსმონავტის" წოდება.

აკაკის კვირეული

     უკვე მესამეკლასელები ვართ. არდადეგების შემდეგ ახალი ენერგიით დავბრუნდით სკოლაში და ჩვენი პირველი ღონისძიებაც დავგეგმეთ - აკაკი წერეთლის კვირეული. შევისწავლეთ ნაწყვეტები აკაკის ,,ჩემი თავგადასავალიდან", აკაკის ლექსები, გამოცანები, მოგონებები მწერლის შესახებ, სიმღერა ,,ჩონგური". ვნახეთ ფილმი ,,აკაკის აკვანი", გამოვუშვით კედლის გაზეთი ,,აკაკის გამოცანები". 6 ოქტომბერს ჩავატარეთ ინტეგრირებული გაკვეთილი ,,საქართველოს ბულბული". გაკვეთილზე მოვისმინეთ აკაკის ხმა და მის ლექსებზე შექმნილი სიმღერები.  გაკვეთილზე გვესწრებოდნენ: სკოლის დირექტორი ბატონი შოთა მალაზონია, დირექტორის მოადგილე ქალბატონი ნანა ლომთათიძე, პედაგოგები და მოსწავლეთა მშობლები.

ჩვენი პირველი ექსკურსია

     28 მაისს, ჩვენი კლასი პირველად იყო ექსკურსიაზე ქალაქგაქრეთ. მოვინახულეთ საქართველოს ძველი დედაქალაქი მცხეთა. ვესტუმრეთ სვეტიცხოვლის ტაძარს და სამთავროს დედათა მონასტერს. ბუნებაში გავმართეთ პიკნიკი. მოსწავლეებმა და მშობლებმა ნამდვილად მხიარული და  დაუვიწყარი დღე გაატარეს ბუნების წიაღში.

ბუბა ბაბუ გვესტუმრა!

    სადამრიგებლო საათის პროგრამაში არსებობს მიმართულება ,,ჯანსაღი ცხოვრების წესი", რომლის მიზანია მოსწავლეებისათვის პირადი ჰიგიენის, დღის რეჟიმის, ფიზიკური აქტივობის, სწორი კვებითი ჩვევებისა და კვების კულტურის დამკვიდრება. ჩვენ ყოველ ხუთშაბათს ვატარებდით  სახალისო გაკვეთილებს აღნიშნულ თემაზე. ჩავატარეთ ,,მხიარული თამაშები", ვიმუშავეთ პროექტზე ,,რატომ უნდა მივირთვათ ხილი", ვესტუმრეთ პირველკლასელებს და გავუზიარეთ ჩვენი ცოდნა ჯანსაღი კვების თაობაზე. დღეს , 7 მაისს, კი გვქონდა შემაჯამებელი ვიქტორინა. სტუმრად გვყავდა სკოლის დირექტორი ბატონი ვალერიან გიორგაძე, დირექტორის მოადგილე ქალბატონი ნინო მეტრეველი, ჩვენი სახელმძღვანელოს ავტორები ქალბატონი თამარ მანჯავიძე, ბატონი ლევან კიკალიშვილი, ფირმა ,,ნესტლეს" წარმომადგენელი ქალბატონი გვანცა გაბუნია და წიგნის პერსონაჟი ბუბა ბაბუ. მოსწავლეებმა თავიანთი ცოდნით მოიპოვეს გასაღებები ჯადოსნური სკივრის გასაღებად. ბუბა ბაბუმ მოსწავლეები სიგელებით დააჯილდოვა. ბავშვებმა კი მას კეთილი სურვილებით სავსე წერილები დაუწერეს.
   ვიქტორინის მასალები შეგიძლიათ იხილოთ mziakhuskivadze.blogspot.com –პრეზენტაციები.